Út er komin hjá Uppheimum bókin Í fótspor afa míns eftir Finnboga Hermannsson. Hér heldur Finnbogi áfram að rifja upp æsku sína þar sem frá var horfið í lok bókarinnar Í húsi afa míns frá 2008 sem nýtur mikilla vinsælda, hlaut einróma lof og var tilnefnd til Bókmenntaverðlauna bóksala. 

Sögusviðið er Reykjavík eftirstríðsáranna og lýðveldið Ísland að verða tíu ára. Fornir lífshættir og fljúgandi nýjungar berjast um athygli sögumannsins og aldamótaþorpið á Njálsgötunni tekur að riðlast. Það gerist æ sjaldnar að heitur blóðmörskeppur sé borinn milli húsa til að gefa smakk, hvað þá að barnsvettlingur fylgi í kjölfarið. Samt er enn hlýja í samskiptum fólks…

Í fótspor afa míns er annað bindið í þríleiknum sem kenndur er við afahúsið á Njálsgötunni. Höfundurinn, Finnbogi Hermannsson, klappar sama stein og í fyrri bók, Í húsi afa míns, sem notið hefur mikillar hylli og var m.a. tilnefnd til Bókmenntaverðlauna starfsfólks bókaverslana 2008. Menn og málefni eru honum stöðug ráðgáta, og hann lýsir af einlægni og nokkurri kaldhæðni tiltektum mannskepnunnar að ota sínum tota í stríði og friði.