Þesssi bók er fágætt safn 2.000 upplýsandi og drepskemmtilegra atvikssagna úr sviðsljósinu. Í þessari kaldhæðnislega innbundnu en dagsönnu revíu, stígur Gísli Rúnar Jónsson dramatískan darraðardans í óformlegu en taktvissu hliðarspori við leiklistarsöguna, við undirleik kostulega ónákvæmrar en alþjóðlegrar ritstjórnar Grínara hringsviðsins.

Öldum saman hefur sviðsljósið verið uppspretta óþrjótandi söguburðar og má þá einu gilda hvort við sögu komu leikstjórinn og leikhússtjórinn sem reyndu að bíta nefið hvor af öðrum, gagnrýnandinn sem kom að konunni sinni uppi í rúmi með ballettdansaranum eða leikskáldið sem gekk í skrokk á leikaranum fyrir að fara afturábak með textann; hvort það var upphlaup í áhorfendasal vegna þess að áhorfandi á öðrum bekk ældi yfir alla á fyrsta bekk, leikmyndin hrundi ofan á aldraða leikkonu sem var að flytja dauðaatriði Ásu í Pétri Gaut eða rafmagnið fór með þeim afleiðingum að hluti Þjóðleikhúskórsins gekk rakleitt ofan í hljómsveitargryfjuna;öll kræsilegustu atvik sem um getur við leikupptroðslur í íslensku sviðsljósi er að finna í þessari bók og gera hana að fágætri lesningu sem allir, óvígðir sem innvígðir, geta notið til afþreyingar milli atriða og á flótta frá sínu eigin hvundagslega leikriti.