„Stærsta kona á Íslandi“ var Guðrún Jónsdóttir í Stígamótum eitt sinn kölluð með vísun til hins mikla brautryðjandastarfs hennar í jafnréttisbaráttunni hér á landi. Eftir að Guðrún hafði starfað sem barnaverndarfulltrúi í braggahverfum og rutt brautina fyrir félagsráðgjafa á Íslandi var hún í fararbroddi þegar Kvennaframboðið kom fram í Reykjavík og aftur þegar Kvennalistinn var stofnaður. Hún sat í borgarstjórn þar sem hún var aldrei „ungfrú meðfærileg“ þó að hún og fleiri konur mættu þar einn daginn búnar eins og fegurðardrottningar í eftirminnilegum gjörningi. Hún var í lykilhlutverki  þegar þögnin var rofin um kynferðisbrot og Stígamótum var komið á laggirnar. Hún stóð alltaf með þolendum án þess að hvika og var meðal annars þess vegna dregin í yfirheyrslu hjá lögreglu.

Í þessari vönduðu ævisögu segir Ingibjörg Dögg Kjartansdóttir sögu Guðrúnar frá því að hún er lítil stúlka í Mýrdalnum og fram á síðustu ár. Þetta er saga um réttindabaráttu og taugastríð, baráttusaga konu sem alls staðar þurfti að brjóta veggi og rjúfa þök, þjóðarsaga um miklar samfélagshræringar þar sem Guðrún var í hringiðunni – en líka falleg fjölskyldusaga um ást og tryggð, gleði og sorgir, vin­áttu og samheldni.

Ingibjörg Dögg Kjartansdóttir hefur starfað við blaðamennsku frá árinu 2006 og hlotið ýmsar viðurkenningar og verðlaun fyrir skrif sín. Hún hefur á ferli sínum fjallað mikið um kvenfrelsismál og aðra réttindabaráttu. Ingibjörg er einn af stofnendum Heimildarinnar og ritstýrir henni. Ég verð aldrei ungfrú meðfærileg er fyrsta bók hennar.

ATH. Spurt og svarað um rafbækur.