Með skáldverkunum Tabúlarasa, Ósýnilega konan, Dýrin í Saigon og Musa hefur Sigurður Guðmundsson stráð óhefðbundum fræjum inn í íslenska bókmenntaflóru. Í Sextet heimsækir Sigurður gömul verk og horfir á þau frá nýju sjónarhorni. Lesandinn fær aðra sýn á verkin sem mynda nú nýja heild. Sextet er frumlegt skáldverk listamanns gegnum lífið, ástina og listina. Bókin nemur 620 blaðsíðum og sá Studio Studio um hönnun hennar. Útgefandi: Ars Longa forlag.

Sigurður Guðmundsson (f.1942) er einn kunnasti listamaður Íslendinga. Hann kom fram á sjónarsviðið á sjöunda áratug síðustu aldar sem einn af stofnendum SÚM og hefur síðan þá starfað að list sinni víða um heim, lengst af í Hollandi og Kína, þar sem hann er búsettur nú. Verk Sigurðar eru margslungin og marglaga og spyrja gjarnan tilvistarlegra spurninga, en um leið er leikgleðin áberandi. Sigurður er ávallt leitandi og hættir aldrei að koma á óvart, hvort sem er í efnistökum eða útfærslu, en þó má greina sterk leiðarstef í gegnum allan hans feril.