Bókmenntahátíð í Reykjavík hefur verið haldin reglulega frá árinu 1985 og flestir fullorðnir bókaormar landsins eiga líklega einhverja góða minningu af fyrri hátíðum, af uppáhaldshöfundi sem þeir fengu til að árita bók, áhugaverðum samræðum, fleygum orðum sem festust í minninu eða skyndihrifningu af höfundi sem þeir höfðu aldrei heyrt á minnst. Nú í vor verður enn Bókmenntahátíð í borg og hefð er orðin fyrir því að Tímaritið kynni einhverja af gestunum. Það tókst einstaklega vel að þessu sinni því lesendur fá hér að kynnast tíu höfundum, ýmist í umfjöllun um þá eða þýðingu á verkum þeirra. Ynja Blær á heiðurinn af teikningunum af höfundunum tíu á kápumyndinni sem úrvalslið þýðenda, fræðimanna og höfunda fjalla hér um: Dinu Nayeri, Mariönu Enriquez, Kim, Colson Whitehead, Alexander McCall Smith, Jenny Colgan, Gonçalo M. Tavares, Leu Ypi, Jan Grue og Vigdis Hjorth.

En þar með er ekki allt upp talið. Haukur Ingvarsson hefur leika með ljóðið Morgunleikfimi fyrir tilvistarspekinga. Í heftinu er jafnframt viðtal Höllu Þórlaugar Óskarsdóttur við Sjón, sem tekur á dögunum við Norrænu verðlaunum sænsku akademíunnar, greining Karitas M. Bjarkadóttur á Sálminum um blómið eftir Þórberg Þórðarson sem barnabók og frásögn Ágústs Guðmundssonar kvikmyndaleikstjóra um menningarþyrsta menntskælinga í Reykjavík á öldinni sem leið. Halldór Magnusson færir okkur smásögu um stirð samskipti nágranna, Arnar Már Arngrímsson birtir ritgerðina Hjónabandsráðgjöf og við fáum þrjú ljóð eftir Stefán Snævarr. Sigurún Alba Sigurðardóttir hugverkjuhöfundur ársins er á sínum stað og þrjár vandaðar bókaumfjallanir, um Lungu Pedros Gunnlaugs Garcia eftir Jórunni Sigurðardóttur, Ísland Babýlón Árna Snævarrs eftir Einar Má Jónsson og um Kollhnís Arndísar Þórarinsdóttur eftir Grétu Sigríði Einarsdóttur.