Helen Cova var 18 ára gömul þegar hún áttaði sig á því að henni fannst alls ekki slæmt að vera ein. Hún ákvað að yfirgefa allt og ferðast alein um heiminn. Í einni ferðinni kynntist hún íslenska drengnum Davíð Stefánssyni. Þá var hún forvitin, listræn og leikglöð 23 ára ung kona og hann snjall, skemmtilegur og uppfinningasamur 6 ára drengur. En svo ólíklega vildi til að á milli þeirra myndaðist dásamleg vinátta. Helen og Davíð voru óaðskiljanleg. Þrátt fyrir að þau töluðu ekki sama tungumál tókst þeim að tjá sig, leika og skapa saman. Þegar Helen hafði samið þessa sögu fannst henni fullkomið að fá Davíð til að myndskreyta hana. Hún var 25 ára og hann 9 ára þegar þau byrjuðu að vinna að þessari bók saman.