Fjórar aldir eru nú liðnar frá fæðingu Hallgríms Péturssonar (1614–1674) sem hefur lengi verið eitt ástsælasta skáld þjóðarinnar, ekki síst fyrir Passíusálmana. Þetta úrval sýnir vel hversu margbreytt skrif hans voru: hann orti um mat og tóbak, fiskveiðar, bústörf og veður, samdi ádeilur, mannlýsingar, rímþrautir og trúarljóð.

Margrét Eggertsdóttir, rannsóknarprófessor á Stofnun Árna Magnússonar í íslenskum fræðum og sérfræðingur í verkum Hallgríms, sér um útgáfuna, velur efnið og ritar formála, orðskýringar og stutta texta um einstök ljóð.