Hefur þig alltaf langað til að kunna töfrabrögð? Dreymir þig um að vinna í sirkus? Eða áttu mörg systkini og finnst þú fá of litla athygli? Þá er Skemmtikrafturinn bókin fyrir þig!

Hér kenna fjörkálfarnir Lalli töframaður og trúðurinn Wally 26 brögð og brellur sem slá í gegn hvar sem er og veita frábær ráð um sviðsframkomu. Þú getur til dæmis lært hvernig á að:

• Láta blýant hverfa
• Búa til ÓGEÐSLEGASTA prumpuhljóð í heimi
• Gera blöðruhund
• Heilla ömmur upp úr skónum (maður græðir alltaf á því)
• Búa til skemmtilegan sviðskarakter

og margt fleira sem á eftir að færa þér og öllum í kringum þig endalausa gleði. Og hugsanlega svolítið af nammi líka …

Lalli hefur skemmt bæði börnum og fullorðnum í mörg ár með trylltum töfrabrögðum, meðal annars með Sirkus Íslands og Reykjavík Kabarett.

Wally ólst upp í sirkusfjölskyldu í Ástralíu en hefur kitlað hláturtaugarnar á Íslendingum um árabil. Hann er einn af stofnendum Sirkuss Íslands.

Teikningar: Helga Valdís Árnadóttir.