Hætt er við að störf margra prestanna hefðu um margt orðið svipur hjá sjón í aldanna rás, ef þeir hefðu ekki haft við hlið sér konu sem var oft þeirra haldreipi. Bækurnar Öll þau Klukknaköll eru gefnar út til heiðurs öllum þessum góðu konum sem höfðu ekkert erindisbréf og engin laun. En þær veittu mönnum sínum oft styrk og kjark þegar mest á reyndi. Í síðara bindinu, sem kemur í bókaverslanir á þessu harða vori, eru frásagnir 24 prestkvenna víðs vegar að af landinu, ásamt fleiri greinum. Ein þeirra segir: “Þegar erfiðleikar koma upp hjá fólki er gjarnan leitað til prestsins og sumum finnst jafnvel nóg að tala við prestsfrúna til þess að létta á hjarta sínu.”