Guðrún Egilson starfaði við dagblaðið Tímann á árunum 1965–1968 og við Þjóðviljann 1969–1970. Hún lauk BA-prófi í íslensku með frönsku og almenna bókmenntasögu sem aukagreinar árið 1976 en starfaði jafnframt við ritstörf og þýðingar.

Hún skrifaði ævisögu Rögnvaldar Sigurjónssonar sem kom út í tveimur bindum 1977 og 1978. Hún lauk síðar prófi til kennsluréttinda og starfaði við Grunnskóla Hafnarfjarðar 1983–1986 en síðan við Verslunarskóla Íslands allt til 2012. Jafnframt var hún málfarsráðgjafi í hlutastarfi við RÚV á árunum 2003–2015.

Árið 1980 hóf Guðrún að skrifa pistla fyrir Lesbók Morgunblaðsins og síðar fyrir Sunnudagsblað Morgunblaðsins. Allt fram til 2018 skrifaði hún pistla fyrir blaðið með stöku hléum, síðast í dálkinn Tungutak.

Árið 2002 kom út eftir Guðrúnu bókin Tvístirni, saga Svanhvítar Egilsdóttur.