Íslenskt prjón sækir innblástur í prjónafatnað og annan klæðnað og muni sem varðveittir eru á Heimilisiðnaðarsafninu á Blönduósi. Flíkur og munstur frá seinni hluta 19. aldar og fram á fyrri hluta 20. aldar eru hér færð í nútímabúning með því íslenska ullargarni sem framleitt er í dag.

Meðal uppskrifta í bókinni eru sokkar, vettlingar, húfur, treflar, peysur og sjöl. Hér eru vestfirskir laufaviðarvettlingar, skagfirskir rósavettlingar, dásamleg útprjónuð sjöl og skotthúfur, togarasokkar, rósaleppar og margt fleira sem setur íslenska prjónahefð í nýjan og skemmtilegan búning.

Höfundurinn, Hélène Magnússon, hefur áður gefið út bókina Rósaleppaprjón í nýju ljósi. Hún er textílhönnuður og lögfræðingur að mennt en hefur síðustu ár rekið hönnunarfyrirtækið Prjónakerlingu og starfað sem leiðsögumaður með áherslu á prjóna- og gönguferðir um hálendi Íslands.